Kreu i Partisë Demokratike, Lulzim Basha ka vazhduar fushatën elektorale në qytetin e Fierit e më pas në Roskovec. Ai është pritur nga qytetarë të shumtë me brohoritje dhe flamuj të PD, ndërsa i ka premtuar atyre se në 25 prill ndryshimi do të jetë realitet.
Basha ka thënë se nuk e ka harruar sakrificën e qytetarëve ndaj të keqes dhe padrejtësinë ndaj tyre. Kryedemokrati tha se së bashku me fermerë të Rosokovecit do bëhet realitet premtimi për t’i rikthyer sovranitetin banorëve të asaj toke fisnike.
“Ndryshimi po vjen, ndryshimi ka ardhur, do jetë realitet. 25 prilli i bashkon gjithë shqiptarët.
Mos kujtoni se e kam harruar sakrificën tuaj ndaj të keqes, padrejtësinë ndaj jush. Të gjithë bashkë, fermerë të Rroskovecit, të bëjmë realitet premtimin e madh që e nisëm këtë betejë, për t’iua rikthyer sovranitetin banorëve të kësaj toke fisnike.
Më 25 prill e tutje Roskovecin do e keni ju në dorë. Shqipërinë do e kenë shqiptarët. Më 25 prill bashkohemi për ndryshim, Roskoveci fiton, Shqipëria fiton. Zoti i bekoftë shqiptarët”, ka thënë Basha.
Më herët gjatë ditës së sotme ai ishte në qytetin e Fierit ku u prit gjithashtu nga qytetarë të shumtë. Takimi elektoral në këtë qark ishte planifikuar për ditën e djeshme, por u shty për shkak të vdekjes së ish-kryeministrit Bashkim Fino.
