Kryedemokrati Lulzim Basha ka vizituar këtë të martë qytetin e Fierit, ku është pritur me entuziazëm nga një numër i madh simpatizantësh.
Në pamjet e transmetuara, ajo që vihet re është grumbulli i madh i njerëzve me pankarta në duar, ku shumica e qytetarëve kanë qenë pa maska mbrojtëse dhe pa distancën e nevojshme.
Pavarësisht këtyre pamjeve, Basha ka vijuar mitingun elektoral, duke vijuar me thirrjet politike e takimet me banorët dhe bizneset.
“Kam marrë mijëra mesazhe nga intelektualë të mëdhenj në vend, na mbështesin. Ndryshimi është i pandalshëm. Mbaj mend kur vija të shtunave këtu, edhe byrektorja ishte shkretëtirë. Ishte një tmerr i vërtetë. Kemi plan konkret për rininë në veçanti. Kemi plan për të ndalur emigracionin. Na duhen njerëz të kualifikuar për të nxitur investimet e huaja.”, është shprehur Basha.
https://www.facebook.com/lulzimbasha.al/videos/3754821694586397
Referuar mbledhjes së fundit të Komitetit Teknik të Ekspertëve, rregullat që u lanë në fuqi e ndalonin rreptësisht grumbullimin në më shumë se dhjetë persona, gjithashtu dhe tubimet elektorale.
Rasti i Fierit, nuk është i vetmi tubim që ka mbajtur Partia Demokrate. Thuajse çdo takim i organizuar së fundmi është zhndërruar në miting dhe me grumbuj njerëzish pa maska e pa distancë fizike. Duke nisur nga Kavaja, Berati e Gjirokastra, thuajse të njëjta pamje janë transmetuar, duke përforcuar mendimin se lideri opozitar nuk është aq sa duhet i shqetësuar për situatën pandemike në vend.
Kujtojmë këtu dhe mitingun hapës në sheshin “Nënë Tereza”, ku pamjet që transmetoheshin të kthenin pas në kohë, kur virusi ende nuk ekzistonte.
