Prej dy ditësh ka nisur vaksinimi masiv i qytetarëve, ku grupi i parë që po merr vaksinat janë ata mbi 70 vjeç.
Dozat që po përdoren janë ato kineze “Sinovax”, që sipas ministres së Shëndetësisë Ogerta Manastirliu, janë të mjaftueshme për të vaksinuar këtë grup-moshë.
Në qytetin e Beratit, por edhe në Tiranë e disa qytet të tjera, procesi i vaksinimit nis që prej orës 09:00 të mëngjesit në të gjitha qendrat Shëndetësore. Sipas njoftimeve, deri më tani në Berat janë vaksinuar 700 qytetarë.
Kujtojmë se kryeministri Edi Rama premtoi se imuniteti i tufës në gjithë territorin do të arrihet brenda harkut kohor të katër muajve. Sipas Ramës vaksinimi do të vijojë deri në muajin qershor, duke nënkuptuar kështu se në verë do i kthehemi normalitetit.
Nga ana tjetër ministrja Ogerta Mansatirliu, theksoi se deri në muajin qershor priten të vaksinohen rreth 500 mijë shqiptarë, ndërsa brenda harkut kohor të 14 muajve do të vaksinohen të gjithë shqiptarët.
Deri më tani në Shqipëri veç vaksinave të njohura e certifikuara nga OBSH dhe EMA, në vend kanë ardhur dhe disa mijëra doza të vaksinave ruse dhe kineze, që ende nuk janë të njohura nga këto instuticione. Gjithashtu, Rama premtoi se në verë, do të rikthehet dhe jeta normale për qytetarët.
