Në sheshin “Skënderbej” ditën e nesërme do të nisë procesi i vaksinimit masiv me vaksinën kineze, duke filluar me të moshuarit mbi 70 vjec.
Pak minuta më parë ka qenë e pranishme ministrja e Shëndetësisë dhe Mbrojtjes Sociale, Ogerta Manastirliu, e cila ka thënë se synohet që të arrihet shifra e 10-15 mijë vaksinimeve në ditë.
”Kemi nevojë të shtrihemi edhe më tej. Nga 10-15 mijë vaksinime në ditë. Kemi arritur që të kemi një numër të mirë vaksinash. Mënyra që do të lajmërohen nga mjeku i familjes për tu futur në listë do të jetë nga mjeku i familjes. Aty do të trokas qytetari. Ai do jetë lajmësi sipas rendit të moshës.”, është shprehur Manastirliu.
Në hapësirën e sheshit “Skënderbej” që prej pasdites kanë nisur përgatitjet për ngritjen e disa tendave që do të shërbejnë si qendra vaksinimi.
Të pranishëm gjatë procesit të vaksinimit me vaksinën kineze Sinovac do të jenë edhe forcat e armatosura.
Deri më tani kanë mbërritur 192 mijë doza të vaksinës Sinovac ndërsa pritet sipas objektivave të qeverisë që brenda muajit qershor të vaksinohen 1.2 milionë shqiptarë.
Por sipas të dhënave që prej fillimit të procesit të vaksinimit ka mbi 62 mijë shqiptarë të vaksinuar, ku përfshihen stafi mjekësor, mësues dhe të moshuar mbi 80 vjeç.
Gjatë ditës së sotme vijoi vaksinimi i pedagogëve me vaksinën AstraZeneca në 4 institucione arsimore, te Universiteti i Arteve, te Bujqësori, te Universiteti i Mjekësisë si dhe Fakulteti i Gjuhëve të Huaja. Kujtojmë se prej të premtes ka nisur edhe marrja e dozës së parë të vaksinës ruse Sputnik nga të moshuarit.
