Procesi i vaksinimit në Shqipëri ka nisur dhe me ardhjen e dozave të reja, numri i njerëzve që po vaksinohen, sa vjen e po rritet. Shifra reale se sa janë të vaksinuar, nuk ka, por qeveria shqiptare, me në krye Edi Ramën dhe Ogerta Manastirliun, premtojnë se popullata e Shqipërisë do të vaksinohet e gjitha brenda 14 muajve të ardhshëm.
Sipas Manastirliut, janë kontraktuar 2.1 milion doza vaksinash dhe procesi, ka nisur pas ardhjes së 192 mijë vaksinave nga Stambolli. Procesi i vaksinimit ka nisur në Durrës, me mësues e pedagogë që janë vaksinuar.
50% e mësuesve në shkollat e Durrësit janë vaksinuar, ndërsa do të vaksinohen sot plot 160 pedagogë të “Aleksandër Moisiut”. Duket se fokusi i qeverisë sa i takon vaksinimit janë mësuesit, në mënyrë që dhe sistemi arsimor të rikthehet sa më shpejt në rrjedhën e ngjarjeve normale.
Kujtojmë që shkollat në Shqipëri gjatë këtij viti pandemik kanë qenë të mbyllura, me studentët që kanë kryer shumicën e orëve mësimorë online. Me nisjen e vaksinimit të mësuesve, duket qartë se ri-hapja e shkollave dhe rikthimi i studentëve në auditore, është primare.
Me 2.1 milion dozat e kontraktuara deri më tani, siç thotë Manastiriliu, të gjithë shqiptarët do të vaksinohen brenda 14 muajve. Është kjo një mënyrë për të bërë fushatë, apo një premtim real dhe i mbajtshëm, kjo gjë mbetet për t’u parë…
