Bisedimet për formimin e një qeverie të re Hollandeze u ndërprenë të Enjten pasi u zbulua se një nga negociatorët kryesorë ishte infektuar me COVID-19. Ministrja e Brendshme Kajsa Ollongren, e ngarkuar për të hartuar mundësitë për të formuar një qeveri koalicioni pas zgjedhjeve kombëtare të javës së kaluar, doli pozitive për COVID-19, tha zyra e saj.
Nuk ishte menjëherë e qartë se kur dhe si mund të rinisnin bisedimet për formimin e qeverisë. Ollongren, një përfaqësuese e partisë pro-Bashkimit Evropian D66, kishte zhvilluar bisedime me udhëheqësit e të gjitha partive në parlamentin Hollandez në ditët para testit të saj, duke përfshirë Kryeministrin Mark Rutte dhe kreun e partisë së saj, Sigrid Kaag. Sipas rregulloreve shëndetësore Hollandeze, Rutte dhe udhëheqësit e tjerë të partisë do të duhet të bëjnë një test COVID-19 pesë ditë pas takimit të tyre me Ollongren për të parë nëse ishin të infektuar.
Rutte doli negativ për koronavirusin të Mërkurën, tha zyra e tij të Enjten, pas një infeksioni të një prej anëtarëve të kabinetit të tij në fund të javës së kaluar. Partia konservatore VVD e Rutte mbetet më e madhja në parlamentin Hollandez pas zgjedhjeve të 15-17 Mars, ndërsa D66 u rendit e dyta. Të dy palët pritet gjerësisht të formojnë një qeveri të re së bashku me deri në tre partnerë të rinj, në një proces që mund të zgjasë me muaj.
