Ndërsa jemi zyrtarisht në muajin e fushatës elektorale, policia e Tiranës ka hartuar një plan masash për mbarëvajtjen e aktiviteteve që priten të zhvillohen pasditen e sotme.
Në rrugët e kryeqytetit, por edhe në akset që të çojnë drejt Sheshit “Skënderbej” dhe Sheshit “Nënë Tereza” do të ketë të ketë patrulla policore, gjithashtu dhe shtim të efektivëve të policisë.
Policia e Tiranës bën me dije se masat vijnë në zbatim të detyrimeve ligjore por edhe situatës së “ndezur” politike ku episodet e përplasjeve fizike nuk kanë munguar.
Për shkak të pandemisë së koronavirusit, beteja politike pritet të zhvillohet kryesisht në rrjetet sociale, apo në tubime të vogla informative, në bazë të protokollit që tashmë është miratuar nga Komiteti Teknik i Ekspertëve.
Takimi i PS organizohet në sheshin kryesor të kryeqytetit “Skënderbej” rreth orës 18:00, për të vijuar më tej në të gjithë vendin.
Ndërsa takimi i PD pritet të zhvillohet në sheshin “Nënë Tereza” në orën 17:00. Në këtë ceremoni, së bashku me krydemokratin Lulzim Basha, do të jenë të pranishëm edhe të gjithë kandidatët e Partisë Demokratike, në 12 qarqet e vendit.
Lidhur me hapjen zyrtare të fushatës elektorale, më herët ka reaguar dhe Komisioni Qendror i Zgjedhjeve. KQZ u bëri apel të gjithë drejtuesve të institucioneve publike të tregojnë vetëpërmbajtje dhe të përmbushin detyrimet e tyre sipas Kodit Zgjedhor.
