Kryedemokrati Lulzim Basha e ka nisur mëngjesin e sotëm me një mesazh drejtuar shqiptarëve . Me anë të një postimi në “Facebook”, Basha ka kujtuar se na ndajnë vetëm 31 ditë larg zgjedhjeve të 25 prillit.
Lideri Demokrat u ka bërë thirrje qytetarëve të votojnë numrin 9, Partinë Demokratike të Shqipërisë.
Ky reagim i kryedemokratit Basha vjen në prag çelje fushate. Kujtojmë se dy partitë kryesore në vend, pritet të zhvillojnë sot fushatën elektorale thuajse në të njëjtën orë, por takimet do të zhvillohen në dy vende të ndryshme në kryeqytet.
Për shkak të pandemisë së koronavirusit, beteja politike pritet të zhvillohet kryesisht në rrjetet sociale, apo në tubime të vogla informative, në bazë të protokollit që tashmë është miratuar nga Komiteti Teknik i Ekspertëve.
Takimi i PD pritet të mbahet në sheshin “Nënë Tereza” rreth orës 17:00. Në këtë ceremoni, së bashku me krydemokratin Lulzim Basha, do të jenë të pranishëm edhe të gjithë kandidatët e Partisë Demokratike, në 12 qarqet e vendit.
Nga ana tjetër takimi i PS do të organizohet në sheshin kryesor të kryeqytetit “Skënderbej” rreth orës 18:00, për të vijuar më tej në të gjithë vendin.
Vetëm pak orë para takimeve të para që priten të mbahen nga liderët e partive kryesore, kanë nisur përgatitjet në dy sheshet kryesore të qytetit.
