Vetëm një muaj larg zgjedhjeve, KQZ ka paraqitur deri më tani disa modele sesi priten të jetë fletët e votimit.
Në shqyrtim janë katër modele të ndryshme, ku vetëm njëra prej tyre nuk përcakton që emrat e kandidatëve të shënohen me emër, por vetëm me numër.
Modeli i parë, liston vetëm partitë dhe koalicionet me emërtime ndërsa kandidatët e tyre janë renditur me numra. Kurse në tri modelet e tjera, kandidatët janë renditur me emra krahas partive dhe koalicionit për të cilin garojnë. Ndryshimet e vetme mes këtyre tri modeleve kanë të bëjnë vetëm me konfigurimin viziv të fletës së votimit.
Publikisht deri tani, opozita ka mbështetur idenë e pranisë së emrave të kandidatëve për deputetë në fletën e votimit, ndërsa mazhoranca qeverisëse ka sugjeruar listim me numra në mënyrë që fleta të jetë praktike.
Kujtojmë se në zgjedhjet e 25 prillit do të kemi dhe një rikthim të opozitës jashtë parlamentare. Ndërsa janë dorëzuar emrat me listat e deputetëve, KQZ pritet të vendosi për modelin e fletës së votimit. Gjithashtu dje (22 mars), KQZ ndau dhe fondin për zgjedhjet, i cili është sa dyfishi i atij të vitit 2017.
Pjesa më e madhe do përfitohet nga Partia Socialiste, e cila do të marrë mbi 55 milionë lekë, e ndjekur nga Partia Demokratike me rreth 33 milionë lekë, LSI me gati 19 milionë lekë dhe gjithë partitë e tjera më shuma më të vogla.
