Kuvendi i Kosovës miratoi ditën e sotme me shumicë votash qeverinë e re me kryeministër Albin Kurtin. Vetëm pak pas konstituimit të institucioneve të reja kanë ardhur edhe urimet e para për Kurtin nga politikanët shqiptarë. Kreu i Partisë Demokratike, Lulzim Basha e ka uruar liderin e LVV në një postim në Facebook ku shkruan se suksesi i Kosovës është edhe i Shqipërisë e shqiptarëve kudo ndodhen. Më tej Basha konfirmon mbështetjen e PD ndaj Kosovës, ndërsa thotë se ka besim se pas 25 prillit do të ketë bashkëpunim edhe më të ngushtë mes dy vendeve.
Postimi i plotë:
“Urimet më të mira kryeministrit të ri të Kosovës z. Albin Kurti dhe qeverisë së drejtuar prej tij në përmbushjen me sukses të përgjegjësive dhe tejkalimin e sfidave me të cilat përballet Kosova. Suksesi i Kosovës është suksesi i Shqipërisë dhe i shqiptarëve kudo që ndodhen.
Urimet më të mira shkojnë sot dhe për deputetët e kuvendit të ri të Kosovës. Jam i bindur se forcat politike në Kosovë do të mund të gjejnë gjuhën e përbashkët për tejkalimin e pengesave, duke vënë mbi gjithçka interesin më të mirë të Kosovës dhe qytetarëve të saj.
Si gjithnjë në të kaluarën, të sotmen dhe në të ardhmen, unë dhe Partia Demokratike do të qëndrojmë fuqimisht në mbështetje të Kosovës dhe të qeverisë së saj me besimin e plotë se pas 25 prillit, do të bashkëpunojmë edhe më ngushtësisht për të përballuar së bashku çdo sfidë”.
