Sot, Shqipëria shënon Ditën Kombëtare të Rinisë, një festë e rëndësishme kombëtare që u vendos më 2009 me vendim të Kuvendit të Shqipërisë. Kjo datë përkujton lëvizjen studentore të dhjetorit 1990, një moment historik që luajti rol vendimtar në rrëzimin e regjimit komunist dhe hapjen e rrugës drejt demokracisë.
Lëvizja Studentore e vitit 1990 është e vetmja Lëvizje paqësore që ndryshoi historinë e Shqipërisë.
Akti i tyre publik, sa qytetar aq edhe politik, i dha fund në mënyrë paqësore epokës të gjatë të vetëizolimit dhe të sundimit ideologjik, duke i hapur kështu rrugën e ekonomisë së tregut dhe shoqërisë së hapur.
Me shprehjen “E duam Shqipërinë si gjithë Europa”, të rinjtë kërkuan ngritjen e sistemit të vlerave perëndimore dhe të shtetit të së drejtës; integrimin në Europë dhe garantimin e pluralizmit politik si bazë kryesore për një shoqëri të lirë.
