613 kg kokainë në kontenierët me banane, ja sa vite burg kërkon Prokuroria për Arbër Çekajn

Google+ Pinterest LinkedIn Tumblr +

Prokuroria e Krimeve të Rënda ka kërkuar 21 vite burg për pronarin e “Arbri Garden”, Arbër Çekaj.

Ky i fundit akuzohet si porositësi i 613kg kokainë në portin e Durrësit.

Kokaina ishte fshehur në kontenierët me banane të kompanisë “Arbri Garden”.

Sipas “Balkanweb”, për shkak të gjykimit të shkurtuar, dënimi pritet të ulet deri në 14 vite.

Për menaxherin e kompanisë, Donaldo Lushaj, organi i akuzës kërkoi 16 vite burg, ndërsa falë gjykimit të shkurtuar atij i duhet të kryejë 10.8 vite.

Për shoferin, Armando Pezaku është kërkuar 8.8 vite burg.

Mësohet se Çekaj ka dalë garant për sasinë e drogës, ndërsa kishte si bashkëpunëtor menaxherin dhe shoferin.

Ndërkohë Çekaj ka akuzuar Prokurorinë për ndërprerjen e hetimeve, pasi sipas tij, po fshihen trafikantët e vërtetë, që nuk kanë guxim t’i prekin.

“Është totalisht e qëllimtë nga ana e policisë, prokurorisë dhe atij personi i cili dha urdhër që operacioni të ndërpritej në magazinat e kompanisë time. Nëse operacioni do të shkonte deri në fund, patjetër që do të ishte kapur grupi kriminal e jo unë. Me gjeni një vend normal të botës që arrestohet pronari i kompanisë që importon fruta, se në kontenierët që nuk janë fare të tijët, gjendet drogë. I vetmi vend është Shqipëria, edhe në Shqipëri i vetmi pronash frutash në burg jam unë. Pra prokuroria ka luftë personale ndaj meje e familjes time, e kjo vetëm për të mbrojtur grupin e vërtetë kriminal që ata e dinë se kush është, por askush nuk guxon ta prekë”, tha Çekaj.

Shpërndaje
Share.

Komento