Një natë më parë një ngjarje e rëndë ka ndodhur në Shkodër, ku një 60-vjeçar humbi jetën si pasojë e flakëve që kapluan banesën e tij, ndërsa bashkëshortja e tij mbeti e plagosur.
Bëhet e ditur se viktima është Kapllan Nasufi ndërsa zjarri masiv ka rënë në vendin e njohur si barakat e romës, përtej urës së Bunës në Shkodër. Mësohet se barakat i përkasin komunitetit rom në Shkodër. Fqinjët e viktimës Kapllan Nasufi, deklaruan se ambulanca ka mbërritur me vonesë në banesë, por drejtori Halluni shprehet se pas njoftimit nga zjarrfikësit, kanë mbërritur vetëm 7 minuta më pas, raporton gazetari Senad Nikshiqi.
Drejtori Halluni thotë se 7 minuta është një kohë optimale për të shkuar në vendngjarje. Drejtori Halluni i bën thirrje qytetareve qe në raste të tilla të njoftojnë vetë shërbimin kombëtar të urgjencës dhe jo t’ia lënë zjarrfikësve, pasi janë minuta të humbura. “Ambulanca është lajmëruar nga shërbimi zjarrikës. Ambulanca e parë ka bërë 7 minuta për të mbërritur në vendngjarje. Më pasë kanë mbërritur edhe 2 ambulanca të tjera. Trupi i viktimës ka dalë i shkrumbuar. Në të tilla raste, qytetarët të lajmërojnë vetë shërbimin kombëtar të urgjencës dhe nuk ka nevojë shërbimi zjarrfikës”, shprehet drejtori i spitalit rajonal të Shkodrës Halluni.
