Një 59-vjeçar nga fshati Progër i Devollit ndërroi jetë pasditen e së hënës pak pasi kishte kryer një trajtim në një klinikë dentare.
Sipas burimeve hetimore, ai kishte shkuar në klinikë së bashku me dy djemtë dhe disa të afërm. Pas realizimit të një mbushjeje dentare, i ndjeri është ankuar disa herë duke thënë “s’jam mirë” dhe më pas ka humbur ndjenjat. Paraprakisht dyshohet se shkaku ka qenë një infarkt. Grupi hetimor ka sekuestruar kartelën mjekësore të pacientit për të verifikuar procedurat e ndjekura gjatë trajtimit.
Policia bëri të ditur se dentisti është proceduar në gjendje të lirë për veprën penale të “neglizhencës në trajtim mjekësor”. Gjatë mbrëmjes, ai është shoqëruar në Komisariatin e Devollit për t’u marrë në pyetje lidhur me rastin.
Nga ana tjetër, familjarët e 59-vjeçarit kanë deklaruar për mediat se nuk kanë pretendime ndaj dentistit, duke theksuar se vdekja ka qenë natyrale dhe ka ndodhur rastësisht pas trajtimit dentar, pa lidhje të drejtpërdrejtë me të.
Hetimet e Prokurorisë dhe grupit hetimor vijojnë për të përcaktuar me saktësi rrethanat dhe shkakun e vdekjes.
