Tragjedi e rëndë në Maqedoninë e Veriut: 51 viktima dhe 118 të plagosur nga zjarri në klubin e natës/ Familjarët i kërkojnë të alarmuar në rrjete sociale
Një ngjarje tronditëse ka ndodhur në orët e para të mëngjesit të 16 marsit në Koçan, Maqedonia e Veriut, ku një zjarr masiv në klubin e natës “Pulse” ka marrë jetën e 51 personave (të moshës 14-25 vjeç) dhe ka plagosur mbi 100 të tjerë. Ngjarja ndodhi rreth orës 02:30 gjatë një koncerti të grupit të njohur maqedonas DNA, me rreth 1,500 të pranishëm në lokal.
Shkaku i zjarrit dhe përhapja e flakëve
Sipas autoriteteve maqedonase, zjarri u shkaktua nga fishekzjarret e përdorura gjatë performancës, të cilat ndezën tavanin. Flakët u përhapën me shpejtësi në të gjithë lokalin, ndërsa tymi i dendur dhe paniku i krijuar bënë që shumë të rinj të mbeteshin të bllokuar brenda.
Ministri i Brendshëm, Pançe Toshkovski, ka konfirmuar se disa viktima janë asfiksuar nga tymi, ndërsa të tjerë kanë humbur jetën si pasojë e djegieve të rënda. Autoritetet kanë nisur hetimet për të përcaktuar përgjegjësitë dhe kanë ndaluar organizatorët e koncertit.
Panik mes familjarëve dhe kërkimet për të mbijetuarit
Qindra familjarë janë mbledhur përpara klubit “Pulse” dhe spitaleve në Koçan, Shtip dhe Shkup, duke kërkuar informacion mbi të afërmit e tyre. Disa prej tyre kanë publikuar foto dhe numrat e telefonit në rrjetet sociale, me shpresën se dikush mund t’i ndihmojë në gjetjen e të dashurve të tyre.
“Po kërkoj mbesën time. Telefoni i saj është duke punuar, por nuk po përgjigjet. Ishim në spitalin në Koçan, në Shtip, disa njerëz i kanë dërguar në Shkup. Nuk dimë ku të kërkojmë më,” është shprehur një grua e dëshpëruar për Radion Evropa e Lirë.
Spitalet në gjendje emergjente
Drejtoresha e Spitalit në Koçan, dr. Kristina Serafimovska, bëri të ditur se spitali i qytetit është mobilizuar brenda 30 minutash nga marrja e thirrjes për ndihmë. 70 persona me djegie dhe helmim nga monoksidi i karbonit janë dërguar menjëherë në qendrat shëndetësore më të afërta, ndërsa një pjesë e tyre kanë ndërruar jetë gjatë trajtimit.
Pacientët më të rënduar janë transportuar në Shkup dhe Shtip, ku po marrin ndihmë në Klinikën për Kirurgji Plastike, Klinikën për Anestezi, Klinikën e Pediatrisë për Kujdes Intensiv dhe Spitalin e Përgjithshëm të Qytetit.
Autoritetet ndërhyjnë, hapen linja ndihme për të prekurit
Në vendin e ngjarjes kanë mbërritur ministri i Mbrojtjes, Pançe Toshkovski, drejtori i Byrosë për Siguri Publike, Aleksandar Janev dhe drejtori i Qendrës për Menaxhimin e Krizave, Stojançe Angellov. Ata kanë deklaruar se autoritetet do të japin informacione të detajuara gjatë ditës, ndërsa të gjithë personat e lidhur me organizimin e ngjarjes janë ndaluar për t’u marrë në pyetje.
Ndërkohë, Kryqi i Kuq ka ofruar ndihma emergjente për të mbijetuarit dhe të lënduarit, përfshirë batanije, shtretër dhe karroca për personat me aftësi të kufizuara. Janë hapur gjithashtu linja telefonike për ndihmë psikologjike për familjet e viktimave dhe të mbijetuarve:
• Koçan: 071/338-081
• Shtip: 074/203-030
• Shkup: 072/271-048
Ministri i Shëndetësisë, Arben Taravari, ka siguruar se aktualisht ka rezerva të mjaftueshme të gjakut për të trajtuar të plagosurit, por do të bëjë thirrje për dhurime nëse lind nevoja.
Shqetësimi për sigurinë në vendet e argëtimit
Tragjedia ka hapur debat mbi sigurinë në klubet e natës dhe përdorimin e mjeteve piroteknike në ambiente të mbyllura. Banorët e Koçanit dhe qyteteve përreth kanë bërë thirrje për rregullore më të ashpra në lidhje me mbipopullimin e lokaleve dhe masat e sigurisë në raste emergjente.
Kjo ngjarje mbetet një nga tragjeditë më të rënda që ka goditur Maqedoninë e Veriut në vitet e fundit, duke lënë një plagë të thellë në zemrat e familjeve të viktimave dhe komunitetit të gjerë. Hetimet janë ende në vazhdim, ndërsa autoritetet premtojnë transparencë dhe mbështetje për të prekurit nga kjo katastrofë e tmerrshme.
