Prezantimi i planit financiar, reagon presidenti Meta: “Të trajtohem si zyrtarët e tjerë”

Google+ Pinterest LinkedIn Tumblr +

Ditën e sotme gjatë prezantimit të planit financiar, Rama bëri me dije se do përgjysmojë edhe rrogat e deputetëve dhe ministrave, por nuk do preket rroga e presidentit Meta, të cilin e falenderoi për ndihmën që ka dhënë deri tani për situatën në të cilën ndodhet vendi.

Pas kësaj, ka ardhur edhe reagimi i kreut të shtetit, Ilir Meta, me anë të një statusi në Facebook ka përshëndetur planin ekonomik të kryeministrit Rama për mbështetjen e bizneseve dhe familjeve në nevojë, në kuadër të “luftës” me Coronavirusin.

Meta thotë se përgjysmimi i pagës së tij do të shkurtohet në të njëjtën mënyrë si dhe për zyrtarët e lartë të shtetit, të parashikuar në planin e bërë publik dhe i kërkon qeverisë që të përcaktojë sa më parë kriteret e ndihmës për biznesin dhe familjet më në nevojë.

Reagimi i plotë i Metës:

“Përshëndes mbështetjen financiare të bërë publike nga Kryeministri.
Ftoj Qeverinë të përcaktojë sa më parë kriteret e ndihmës për biznesin dhe familjet më në nevojë.
Inkurajoj gjithashtu konsultimin me grupet e interesit për të bërë transparente detajimin e fondeve, për t’u dhënë përgjigje të menjëhershme nevojave emergjente të qytetarëve. Sa i përket trajtimit financiar të Presidentit të Republikës, ai do të shkurtohet në të njëjtën mënyrë, si dhe për zyrtarët e lartë të shtetit, të parashikuar në planin e bërë publik. Po kështu Institucioni i Presidentit të Republikës është solidarizuar me shkurtimin e fondit të buxhetit vjetor në interes të riadresimit të tyre, në mbështetje të shëndetësisë dhe sektorëve të vijës së parë në këtë përballje me pandeminë globale të COVID 19. Bashkëpunimi, gjithëpërfshirja, humanizmi dhe solidariteti mbarëkombëtar do të na japë të gjithëve fuqinë e duhur pozitive për ta fituar këtë sfidë, duke mundur frikën, me besimin e palëkundur te e ardhmja dhe në Zot.”

Virusi që lindi në Kinë në fund të 2019, ka shkaktuar deri tani rreth 10, 000 viktima dhe ka infektuar mbi 241,000 persona në 177 shtete.

OBSH ka shpallur pandeminë, teksa epiqendra e virusit tashmë është zhvendosur në Europë, në një kohë kur Kina po rimerr veten dita-ditës dhe madje po ndihmon shtetet e tjera të prekura.

Qeveria shqiptare ka ndërmarrë një sërë masash për të parandaluar përhapjen e Coronavirusit, teksa është kufizuar qarkullimi i makinave dhe i këmbësorëve.

Gjithashtu ka nisur aplikimi i gjobave për ata që nuk respektojnë rregullat e vetëkarantinimit, kompanitë që nuk marrin masat ndaj Coronavirusit dhe tregtarët që rrisin çmimet në mënyrë abuzive.

Shpërndaje
Share.

Komento