Një rrjet ndërkombëtar trafiku droge u çmontua në Itali, duke çuar në kërkimin e dënimeve që kapin një total prej 57 vitesh burg për shtatë të pandehur, mes tyre tre shqiptarë të konsideruar si pjesë kyçe të strukturës kriminale.
Pretenca u shpall nga prokurorja Giovanna Cannarile në gjykatën e Brindisit, në kuadër të procesit gjyqësor që pasoi hetimin e nisur nga Guardia di Finanza.
Sipas akuzës, grupi trafikonte sasi të mëdha kokaine dhe heroine nga Holanda drejt Italisë, të fshehura në pjesë të modifikuara të mjeteve të rënda dhe të depozituara më pas në zonën e Brindisit.
Në janar 2022, gjatë operacionit të koduar “Tackle”, policia italiane arrestoi 23 persona.
Në mesin e të pandehurve, tre shqiptarëve u kërkohet një dënim i rëndë, Kujtim Metaj rrezikon 18 vjet burg, Adrian Boci 12 vjet, ndërsa Romeo Myftari 8 vjet.
Të tjerë italianë përfshirë në grup përballen me kërkesa që variojnë nga 4 në 7 vjet burg.
Prokurorja e DDA-së theksoi se hetimi kishte zbuluar një strukturë të ndarë në dy nën-grupe operative, që vepronin me baza në Oria dhe logjistikë në Holandë, ndërsa logjistika e transferimit të parave në Shqipëri bëhej përmes shoferëve të autobusëve.
Përgjimet ambientale, ndjekja në terren dhe pajisjet kundërzbulimit të përdorura nga të pandehurit u përshkruan si të pamjaftueshme për të shmangur hetimin e autoriteteve.
Procesi gjyqësor ndodhet në fazat përfundimtare, ndërsa një pjesë e të pandehurve kanë përfituar nga gjykimi i shkurtuar.
Rasti mbetet një tjetër shembull i përfshirjes së elementëve shqiptarë në rrjete të sofistikuara kriminale me shtrirje ndërkombëtare në Itali.
