Një jetë që s’u jetua kurrë, një dhimbje që nuk ka fjalë ta përshkruajë dhe një prindërim i mbetur pezull.
Në një aksident tragjik në rrugën e Lumit të Vlorës, u shua jeta e 22-vjeçarit Fatjon Kasaj, i vetmi djalë i një çifti që sot përballet me humbjen më të madhe: dritës, shpresës dhe çdo arsyeje për të vazhduar përpara.
Fatjoni ishte në fillesat e jetës, me ëndrra dhe shpresa, me rrugë që prisnin të përshkoheshin. Por gjithçka u ndërpre në mënyrë brutale, kur një automjet i drejtuar nga një 80-vjeçar i mori jetën. Autori u arrestua menjëherë pas ngjarjes, por ajo që pasoi ngjalli vetëm konfuzion, revoltë dhe ndjesinë e thellë të mungesës së drejtësisë për prindërit e të ndjerit.
Sipas denoncimeve të familjes Kasaj, versionet për fatin e autorit Josif Kozdine kanë ndryshuar në mënyrë të çuditshme: fillimisht u përfol se kishte ndërruar jetë në burg, më pas në shtëpi, e më tej u tha se ishte liruar me arrest shtëpie. Derisa fundjavën e kaluar, burime jozyrtare konfirmuan ndarjen e tij nga jeta dhe zhvillimin e një ceremonie mortore.
Prindërit e Fatjonit, të mbuluar nga dhimbja dhe të zhgënjyer nga mungesa e transparencës, ndihen të braktisur nga drejtësia.
Nëna e tij, e ftuar në emisionin “Me Zemër të Hapur” në News24 me autore Evis Ahmetin, rrëfeu me lot në sy dramën që po përjeton prej gjashtë muajsh:
“Asnjë nënë mos e provoftë, është një helm që s’duhet ta provojë asnjë nënë. Fatjoni ishte një djalë i dashur, i shkolluar. Atë ditë do të ikte të takonte të atin në Lukovë. Në orën 14:50 po e merrnim në telefon, nuk po na përgjigjej. Aty pastaj mu fik çdo gjë, nuk mbaj mend asgjë.
Prej gjashtë muajsh që ka ndodhur ngjarja, nuk na kanë folur kurrë dhe as nuk na kanë kërkuar falje. Fëmijët e tij të paktën duhet të na kishin kërkuar falje. Ai person kemi dëgjuar që bënte shumë aksidente. Si lejohej të ngiste makinën në moshën 81-vjeçare kur ishte i sëmurë? Një javë para ngjarjes një kushëririn tim e nxori nga rruga pasi i zuri rrugën. Ka qenë një person shumë problematik në këtë drejtim, siç na thonë, pasi ne nuk e njohim. Si mund të marrin patentë 81-vjeçarë e të dalin në rrugë? Prokurori thotë është i sëmurë, ndaj e nxorën në arrest shtëpie. Kur ishte aq i sëmurë, si i dhanë patentë dhe e lejonin të dilte në rrugë? Më kanë marrë zemrën, si nuk na kanë kërkuar falje as fëmijët e tij?”
