Procesi gjyqësor ndaj biznesmenit italian Francesco Becchetti vazhdon të zvarritet në Gjykatën e Apelit me Juridiksion të Përgjithshëm, me seanca të përsëritura që shtyhen për arsye procedurale.
Seanca e parashikuar për këtë të hënë, më 28 prill, u shty sërish – kësaj here për më 12 maj, ora 09:00 – pas një kërkese nga avokatët mbrojtës, të cilët vijojnë të kërkojnë regjistrimet audio të seancave të zhvilluara në Gjykatën e Shkallës së Parë. Pavarësisht tërheqjes për vendimmarrje, trupa gjykuese vendosi të pranojë kërkesën, duke u angazhuar t’ua vendosë në dispozicion materialet përmes emailit sa më shpejt.
Në këtë proces, nga janari i vitit 2024 e deri më sot, janë regjistruar plot 20 shtyrje të seancave gjyqësore. Trupi gjykues, i përbërë nga gjyqtarët Genti Shala, Brikena Ukperaj dhe Dritan Hasani, bëri të ditur se kjo është hera e fundit që do pranohen kërkesa të ngjashme nga mbrojtja, duke sinjalizuar nevojën për përshpejtimin e procesit.
Avokatët e Becchettit iu drejtuan Apelit pas vendimit të Gjykatës së Shkallës së Parë, e cila e dënoi biznesmenin me 17 vite burg. Sipas akuzës, ai ka ndërtuar një skemë mashtruese përmes kompanive të tij, duke përfituar në mënyrë të paligjshme nga TVSH-ja dhe duke u përfshirë në pastrim parash.
Francesco Becchetti përballet me akuza të rënda penale, përfshirë: “Vjedhje duke shpërdoruar detyrën”, “Pastrimi i produkteve të veprës penale ose veprimtarisë kriminale”, “Falsifikim dokumentesh” dhe “Krijimi i skemave mashtruese në lidhje me tatimin mbi vlerën e shtuar”.
