Presidenti i Serbisë Aleksandar Vuçiç dhe kryeministri Edi Rama nuk do të marrin pjesë në takimin e nesërm në Novi Sad, në kuadër të një konference dy ditore për Ballkanin e Hapur.
Sipas mediave serbe, ky ndryshim ka ndodhur në momentin e fundit, ku më herët është njoftuar pjesëmarrja e liderëve të dy shteteve.
Më tej, media “Danas” shkruan se në konferencën që do të mbahet nesër do të jetë e pranishme kryeministrja serbe Ana Brnabiç si dhe kryeministri i Maqedonisë së Veriut përmes platformave online.
Konferenca dy -ditore “Ballkani Perëndimor, një hap drejt tregut të përbashkët të BE -së” po mbahet sot dhe nesër në Novi Sad.
Organizatorët e atij tubimi janë Fondi për Çështjet Evropiane të Vojvodinës, Fondacioni Konrad Adenauer dhe Forumi Rajonal i Liderëve të Rinj.
Fillimisht ishte planifikuar që Vuçiç, Rama dhe Zaev të flisnin nesër në të ashtuquajturin panel udhëheqës, si dhe t’i drejtoheshin shtypit më pas.
Kjo ngjarje po mbahet në përvjetorin e krijimit të nismës së “Minishengenit” mbi bashkëpunimin ekonomik në Ballkan, takimi i parë i të cilit u mbajt në vitin 2019 në Novi Sad në tetor, dhe i cili kohët e fundit ndryshoi emrin në Ballkan të Hapur.
Burimet diplomatike shprehen se ndryshimi mund të lidhet drejtpërdrejt me tensionet aktuale në Kosovë.
