Një aksident tragjik ndodhi tre ditë më parë në Greqi.
Një 19-vjeçar shqiptar humbi jetën në zonën e quajtur Perama në ishullin e Mitilinit, si pasojë e një aksidenti me motor.
Në këtë aksident humbi jetën edhe një i ri grek.
Mësohet se dy të rinjtë po udhëtonin me motor në aksin rrugor, Papadhou-Perama, në momentin kur ndodhi përplasja fatale.
19-vjeçari shqiptar që ka humbur jetën mësohet se është Salea Hamzai.
Tre ditë pas ngjarjes së rëndë, të afërm dhe miq të familjes Hamzai kanë vendosur të shpërndajnë një apel për ndihmë drejtuar shqiptarëve dhe të gjithë personave që kanë mundësi.
Familja ndodhet në vështirësi ekonomike dhe në apel bëhet thirrje për një kontribut sado të vogël ekonomik për ta.
Sikur të mos u mjaftonte humbja e djalit të tyre në “lule të jetës”, familja e Saleas ndodhet në një situatë të vështirë ekonomike.
Në dispozicion është vendosur edhe numri i llogarisë për të gjithë ata që kanë mundësi të ndihmojnë.
Sipas “Joq”, një mike e motrës së viktimës duke ditur gjendjen e tyre me ekonominë ka dashur t’i ndihmojë sadopak, duke bërë apelin e dhimbshëm për çdo shqiptar, me shpresën se dikush do ketë mundësi edhe t’i ndihmojë.
