Policia e Vlorës ka zbardhur detaje të reja nga ngjarja e rëndë që ndodhi mesditën e djeshme në lagjen “Kushtrimi”, ku një 17-vjeçare tentoi të vetëvritej me armë zjarri, duke mbetur rëndë e plagosur në kokë.
Pas hetimeve paraprake, policia ka arrestuar babain e vajzës, 43-vjeçarin S.S., i cili dyshohet se ka ushtruar dhunë ndaj së bijës, çka mendohet të ketë shtyrë të miturën drejt këtij akti ekstrem.
Ndërkohë, është proceduar penalisht edhe gjyshi i vajzës, i cili po hetohet në gjendje të lirë për armëmbajtje pa leje.
Sipas policisë, arma me të cilën u krye tentativa për vetëvrasje ndodhej në banesën e gjyshërve dhe rezulton të ishte në posedim të tij pa leje.
Njoftimi i Policisë Vlorë:
Vlorë/Vijojnë hetimet për zbardhjen dhe dokumentimin e ngjarjes së ndodhur dje, në lagjen “Kushtrimi”, ku u vetëplagos rëndë me armë zjarri një 17-vjeçare.
Vihet në pranga babai i 17-vjeçares dhe procedohet në gjendje të lirë gjyshi i saj.
Në vijim të veprimeve hetimore që po kryhen në drejtimin e Prokurorisë, për zbardhjen e rrethanave të ngjarjes së ndodhur mesditën e djeshme, në lagjen “Kushtrimi”, ku një shtetase 17 vjeçe mbeti e plagosur rëndë pas tentativës për vetëvrasje me armë zjarri, specialistët për Hetimin e Krimeve të Komisariatit të Policisë Vlorë:
• arrestuan në flagrancë, për veprat penale “Dhuna në familje” dhe “Shkaktimi i vetëvrasjes”, shtetasin S. S., 43 vjeç, banues në fshatin Romës, Vlorë, pasi dyshohet se, për shkak të dhunës së ushtruar ndaj vajzës së tij të mitur, ajo ka tentuar të vetëvritet, në gjendje të rënduar psikologjike, me armë zjarri të dyshuar pistoletë;
• referuan materialet në Prokurori ku nisi procedimi në gjendje të lirë për shtetasin P. H., 76 vjeç, gjyshi i të miturës, për veprën penale “Mbajtja pa leje dhe prodhimi i armëve, armëve shpërthyese dhe i municionit”, pasi dyshohet se posedonte në mënyrë të paligjshme armën e zjarrit me të cilën ka tentuar të vetëvritet mbesa e tij.
Vijon puna për gjetjen e armës së zjarrit, e cila dyshohet se është fshehur nga familjarët pas ngjarjes, si dhe kryerja e veprimeve të tjera hetimore, me qëllim dokumentimin e plotë të mekanizmit dhe rrethanave të kësaj ngjarjeje.
Shtetasja e mitur ndodhet në Spitalin e Traumës, nën kujdesin e mjekëve.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Vlorë, për veprime të mëtejshme.
