Drejtoria e Përgjithshme e Rrugëve dhe Ndriçimit Publik, në varësi të Bashkisë së Tiranës, ka hapur një tender me vlerë rreth 1.4 milionë euro për mirëmbajtjen e sheshit “Skënderbej”, duke ngritur sërish dyshime për një procedurë të paracaktuar në favor të kompanisë “Fusha”.
Dokumentet e hulumtuara nga Vox News tregojnë se kjo kompani ka qenë përfituesja kryesore e fondeve që lidhen me këtë projekt, duke fituar si tenderët e ndërtimit me vlerë rreth 17 milionë euro, ashtu edhe procedurat e mirëmbajtjes në vijim. Edhe në vitin 2023, “Fusha” u shpall fituese, ndonëse në garë kishte oferta më të ulëta, të cilat u skualifikuan.
Tenderi i vitit 2026 parashikon një kontratë 32-mujore me fond limit 132 milionë lekë, ndërsa hapja e ofertave është caktuar më 20 prill. Specifikimet përfshijnë një gamë të gjerë shërbimesh, nga pastrimi i sipërfaqeve dhe mirëmbajtja e koshave të mbetjeve, deri te kujdesi për ndriçimin, hapësirat e gjelbra, shatërvanët, kanalizimet dhe elementët urbanë të sheshit.
Megjithatë, kriteret e vendosura në dokumente, veçanërisht kërkesa për eksperiencë të ngjashme në masën 40% të vlerës së kontratës, konsiderohen si përjashtuese për shumicën e operatorëve dhe favorizuese për një kompani të vetme që ka qenë e përfshirë në të gjitha fazat e këtij projekti.
Mungesa e transparencës mbi të ardhurat që gjeneron ky shesh dhe fakti që i njëjti operator vijon të fitojë kontratat, forcojnë dyshimet për shkelje të konkurrencës dhe një proces formal, ku rezultati duket i përcaktuar paraprakisht.
