“Nuk kemi bërë kërkesë formale për përjashtim, por kemi ngritur një çështje politike. Partia Demokratike nuk është “badigard” i PSE-së”, kështu shprehet kreu i i Punëve të Jashtme të Partisë Demokratike italiane, Peppe Provenzano.
Së fundmi në mediat italiane ka qarkulluar lajmi se PDI ka kërkuar Partisë Socialiste Europiane përjashtimin e Partisë Socialiste shqiptare.
Gjatë një interviste për “Askanews”, Peppe Provenzano ka saktësuar atë që u raportua sot nga “La Repubblica” për qëndrimin që Partia Demokratike në lidhje me marrëveshjen Rama-Melon. Ai thekson se nuk është kërkuar një gjë e tillë nga PDI.
“Ne e konsiderojmë marrëveshjen e Shqipërisë me qeverinë italiane seriozisht të gabuar nga të gjitha këndvështrimet dhe potencialisht të dëmshme për të drejtat e njeriut. Nuk kemi kërkuar përjeshtimin e Partisë Socialiste. Presidencës së PSE-së do t’i shtrojmë çështjen e përputhshmërisë ndërmjet kësaj lloj marrëveshjeje dhe parimeve të socializmit evropian. Çështja për ne nuk është procedura, ne kemi nevojë për një diskutim që përcakton një vijë të qartë për një çështje vendimtare”, shtoi ai.
