Pas Valbona Sakos, një tjetër funksionare e Partisë Socialiste ka lëshuar gafën e radhës.
Bëhet fjalë për zv.ministren e Mjedisit, Ornela Çuçi.
Kjo e fundit në një intervistë për Top Channel është shprehur se në Durrës nuk ka asgjë të jashtëzakonshme.
Kjo deklaratë erdhi në kuadër të dilemës, nëse duhet apo nuk duhen ndezur dritat e vitit të ri në Durrës pas tërmetit.
“Nuk ka një moment të duhur ose jo të duhur. Ky është momenti, është dita kur të gjithë në botë dekorojnë qytetet e tyre për shkak të festave. E tillë është edhe situata në Durrës, nuk ka asgjë të jashtëzakonshme”, thotë ajo.
Kjo gafë vjen pak ditë pas asaj të kryebashkiakes së Durrësit, Valbona Sako, e cila tha: “jemi të kënaqur me 50 viktima”.
“Për hir të së vërtetës duhet ta themi, ky ishte një tërmet i nivelit shkatërrimtar… Por të jemi të kënaqur edhe me 50 viktima, për arsye se në raste të tjera kanë qenë mbi një mijë viktima”, u shpreh Sako.
Kjo e fundit tha gjithashtu, se qytetarët janë strehuar në hotele me 5 yje, ku nuk do të kishin mundësi të shkonin kurrë me pushime.
Pas këtyre deklaratave, Sako u gozhdua nga rrjeti dhe dha dorëheqjen nëpërmjet një postimi në rrjetet sociale.
Kujtojmë këtu se qeveria shpalli më 27 nëntor gjendjen e jashtëzakonshme në Durrës dhe Tiranë, e cila do të zgjasë 30 ditë.
