Ditën e djeshme kryetari i PD-së, Lulzim Basha u shpreh se në ditët e fundit ka pasur një zjarr në katin e katërt te zyra e prokurimeve te Ministria e Shëndetësisë dhe sipas tij zyrtarët e kësaj ministrie duke qenë se nuk ja kanë dalë për të manipuluar tenderat, tashmë që SPAK-u nisi hetimet u vendosën flakën dokumenteve.
Pas mohimit të akuzave nga Manastirliu, reagoi sekretari i përgjithshëm i PD, Gazmend Bardhi, i cili u shpreh se sot do publikohen provat që vërtetojnë akuzat e selisë blu.
Dhe siç ishte paralajmëruar në një deklaratë për shtyp, Bardh Spahia ka publikuar një e-mail zyrtar të Ministrisë së Shëndetësisë, që sipas tij provon rënien e zjarrit dhe djegien e dokumentave në katin e Zyrës së Prokurimeve.
Në e-mail thuhet: “Pas kontrolleve rezultoi se u gjetën letra të djegura dhe të shuara me ujë në katin e katërt të ndërtesës, tymi i të cilave aktivizoi sinjalin e alarmit”.
“Në datën 15 Prill, në orën 18:00, në Ministrinë e Shëndetësisë janë djegur dokumente. Pas rënies së alarmit për zjarr, rojet e godinës kanë konstatuar djegien e dokumenteve në katin e katërt të godinës. Siç e shikoni, kjo nuk është fantazi e jona. Është një email zyrtar i Ministrisë së Shëndetësisë, që provon rënien e zjarrit dhe djegien e dokumentave në katin e Zyrës së Prokurimeve, pikërisht atë që mohoi dje paturpësisht Ministrja e Vjedhjeve COVID, Ogerta Manastirliu.”
Partia Demokratike i kërkoi Prokurorisë së Posaçme Antikorrupsion të përfshijë në hetimin e kësaj çështje edhe djegien e dokumenteve më 15 prill, si dhe fshehjen e të vërtetës nga Ministrja e Shëndetësisë, duke mohuar publikisht rënien e zjarrit.
Më herët mëngjesin e kësaj të diele u raportua se Prokuroria e Posaçme Kundër Krimit e Korrupsionit (SPAK) ka paralajmëruar ministren e Shëndetësisë dhe Mbrojtjes Sociale, Ogerta Manastirliu, nga e cila prej 10 ditësh nuk merr përgjigje lidhur me tenderat sekretë për të cilat SPAK ka nisur kryesisht hetimet.
Të premten ndaj ministres Manastirliu është nisur një kërkesë e dytë për informacion pasi në kërkesën e parë prej 10 ditësh ajo nuk i është përgjigjur.
LEXO: Manastirliu nuk u është përgjigjur pyetjeve, SPAK paralajmëron: Do bastisim zyrat
