Ministri i Mbrojtjes Niko Peleshi deklaron se situata është nën kontroll dhe zjarri po shkon drejt izolimit të plotë në malin e Shpiragut, në bashkinë e Beratit.
Zjarrëfikëse nga Berati, Kuçova e Fieri, qindra forca të ushtrisë dhe efektivë të Policisë së Shtetit janë angazhuar për fikjen e zjarrit, si dhe në ndihmë kanë shkuar edhe helikopterë.
Në një postim në rrjetet sociale Peleshi njofton se në mbështetje të forcave në terren u angazhuan edhe 50 trupa të tjerë nga reparti i Poshnjes, duke e çuar në 100 numrin e efektivëve të Forcave të Armatosura që po punojnë me intensitet deri në shuarjen përfundimtare të tij.
Për shkak të terrenit të vështirë që nuk mundëson ndërhyrjen me mjete zjarrfikëse, helikopteri Cougar ka ardhur në ndihmë që në orët e para të mëngjesit, duke vijuar gjatë gjithë ditës ndërhyrjen nga ajri.
