Ditën e sotme Gjykata e Tiranës ka lënë në burg dy punonjësit e policisë Hajredin Boja dhe Fatmir Isufi të cilët akuzohen për shpërdorim detyre lidhur me ngjarjen e ndodhur në datën 26 mars ku u përfshi nga flakët komisariati numër 5 në Kamëz.
Si pasojë e zjarrit humbi jetën i ndaluari Arben Mici i cili ishte autori i vënies së zjarrit të komisariatit. Të plagosur mbetën edhe Dilaver Idrizi një tjetër prej të ndaluarve dhe gjithashtu edhe vetë polici Hajredin Boja.
Njoftimi i Plotë:
Më datë 26.03.2022, në Komisariatin e Policisë Nr.5, Tiranë është krijuar një vatër zjarri në dhomat e sigurisë të të arrestuarve. Gjatë kësaj kohe, në dhomat e sigurisë kanë qënë të shoqëruar shtetasit me iniciale D.I dhe A.M të cilët kanë marrë dëmtime shëndetësore nga asfiksimi i tymit të krijuar.
Shtetasi me iniciale A.M pas marrjes së ndihmës mjekësore si pasojë e asfiksimit ka ndërruar jetë në spital. Referuar interesimit të medias për këtë rast njoftojmë se:
Gjykata e Rrethit Gjyqësor Tiranë, ka zhvilluar gjykimin lidhur me vlerësimin e ligjshëm të “Arrestit në flagrancë” dhe caktimin e masës së sigurimit “Arrest në burg” për personat nën hetim me iniciale H.B dhe F.I, të dyshuar për kryerjen e veprës penale të “Shpërdorimi i detyrës”, e parashikuar nga neni 248 i K.Penal.
Me vendimin nr. 744 Akti, datë 29.03.2022 Gjykata e Rrethit Gjyqësor Tiranë ka vendosur:
-Vlerësimin si të ligjshëm të arrestit në flagrancë të personit nën hetim H.B.
-Caktimin si masë sigurimi personal ndaj personit nën hetim H.B, atë të “Arrestit në burg”, parashikuar nga neni 238 i K.Pr.Penale.
-Vlerësimin si të ligjshëm të arrestit në flagrancë të personit nën hetim F.I.
-Caktimin si masë sigurimi personal ndaj personit nën hetim F.I, atë të “Arrestit në burg”, parashikuar nga neni 238 i K.Pr.Penale.
Çështja në apel u shqyrtua mbi bazën e ankimit të bërë nga personi nën hetim me iniciale F.I.
Në vijim, Gjykata e Apelit Tiranë, e përbërë nga Gjyqtare znj. Elbana Lluri, me vendimin nr. 364, datë 21.04.2022 vendosi:
-Miratimin e vendimit nr.744 akti, datë 29.03.2022 të Gjykatës së Rrethit Gjyqësor Tiranë.
