Ka ndërruar jetë në spital 57-vjeçari që mbeti i plagosur rëndë ditën e djeshme gjatë shpërthimit të një zjarri në fabrikën e re të tullave në Maminas. 57-vjeçari menjëherë pasi u nxor nga fabrika u nis për në spital. Burime bëjnë me dije se ai po kurohej për plagët e marra në spitalin Francez në Tiranë, por për shkak të dëmtimeve të shumta që kishte marrë ai nuk mundi që të mbijetojë.
Policia ka bërë me dije se në pranga ka rënë një 67-vjeçar, i cili ishte përgjegjës teknik në fabrikën e tullave.
“Specialistët për Krimet në Komisariatin e Policisë Shijak kanë arrestuar në flagrancë shtetasin B.Z., 67 vjeç, banues në Tiranë, me detyrë përgjegjës teknik në fabrikën e tullave në Maminas, pasi nga zjarri i rënë ditën e djeshme në këtë fabrikë, si pasojë e mos respektimit të rregullave të mbrojtjes në punë u lëndua nga zjarri shtetasi B.B., 57 vjeç, banues në Tiranë, i cili ndërroi jetë mëngjesin e sotëm në QSUT Tiranë”, njofton policia.
Fabrika e sapondërtuar e tullave u përfshi nga flakët paraditen e djeshme rreth orës 11:00. Në momentin e zjarrit në fabrikë kanë qenë rreth 120 punëtorë, por kanë dalë menjëherë. Adriatik Velaj, shefi i zjarrfikësve Durrës tha se dyshohet se bëhet fjalë për një shkëndijë elektrike.
