Prej më shumë se tre ditësh, një vatër e madhe zjarri ka përfshirë pyjet e Tërnovës, në njësinë administrative Zerqan të Bashkisë Bulqizë. Flakët, të favorizuara nga temperaturat e larta dhe era e fortë, kanë depërtuar edhe në pyjet e kurorës së “Liqenit të Zi”, duke shkaktuar dëme të konsiderueshme në mjedis.
Pavarësisht ndërhyrjeve të bëra nga toka, zjarri nuk është shuar ende, duke bërë që situata të përkeqësohet. Për të përballuar këtë emergjencë, autoritetet kërkojnë ndërhyrje të menjëhershme nga ajri për të ndaluar përhapjen e mëtejshme të flakëve.
Vetëm pak ditë pasi ishte bërë e mundur shuarja e këtyre flakëve, ato janë rindezur duke rrezikuar një masiv pyjor me pisha shekullore. Ndërkaq, policia e Dibrës nuk ka ende asnjë person të ndaluar për këto zjarrvënie që deri tani kanë shkaktuar dëm të madh ekonomik. Deri më tani nuk ka asnjë informacion zyrtar nëse kjo vatër është rindezur qëllimisht apo si pasojë e vatrave të mëparshme.
