Gjatë 24 orëve të fundit janë evidentuar 38 vatra zjarri në vend, nga të cilat 31 janë shuar ndërsa 7 vazhdojnë të jenë aktive.
Qarku Vlorë
Në bashkinë Finiq, forcat e emergjencës kanë punuar gjatë gjithë natës për të kontrolluar situatën, e cila vijon të jetë e vështirë. Për të siguruar sigurinë e banorëve, janë evakuuar 15 familje nga fshati Velahovë dhe 36 familje nga fshati Livinë, pa raporte për dëmtime apo lëndime. Në ndihmë kanë ardhur edhe tre autoambulanca të Urgjencës Mjekësore.
Situata mbetet kritike në disa vatra zjarri: mbi fshatin Hardhasov, ku era përhap zjarrin drejt jugut në drejtim të Navaricës dhe perëndimit në drejtim të fshatrave Fitore dhe Krane. Në fshatin Bistricë po vazhdojnë operacionet me mjete të Ministrisë së Zhvillimit Shëndetësor (MZSH) dhe Forcave të Armatosura (FA). Po ashtu, me intensitet punojnë për shuarjen e zjarrit mbi Dhrovjan dhe Krongj. Terreni i vështirë dhe shtrirja e madhe e vatrave pengojnë përdorimin e mjeteve tokësore, ndaj është kërkuar ndihmë ajrore me helikopterë.
Në terren po operojnë: 37 zjarrfikës me 6 automjete zjarrfikëse nga bashkitë Finiq, Sarandë, Konispol dhe Delvinë; 20 forca policore; 30 forca bashkiake dhe vullnetare; 28 efektivë të Forcave të Armatosura me 4 automjete zjarrfikëse, 1 autoambulancë, 1 autobot, 60 trupa dhe 1 helikopter. Në fshatin Dhrovjan po operon edhe avioni kroat Canadair.
Në zonën “Rëzom” pranë Tunelit të Skërficës, në majën e Lucës, ku rrezikohen sipërfaqe pyjore me bredh dhe shkurre, terreni i vështirë e bën të pamundur përdorimin e mjeteve tokësore. Për këtë arsye do të ndërhyhet edhe me inspektorët e Agjencisë së Zonave të Mbrojtura (AdZM).
Në fshatin Bolenë, Njësia Administrative Horë-Vranisht, bashkia Himarë, zjarri po përhapet në pyll me pisha. Në terren janë forcat e MZSH Himarë me 2 mjete zjarrfikëse, forcat e MZSH Vlorë me 1 mjet zjarrfikës dhe banorë të zonës. Ndihmë i kanë dhënë edhe 20 efektivë të Forcave të Armatosura.
Qarku Lezhë
Në fshatin Malaj i Epërm, njësia administrative Rrëshen, bashkia Mirditë, zjarri është aktiv në pyje me pisha, lis dhe shkurre, në lagjen “Vjollcë”. Zjarri është nën kontroll dhe sot do të punohet me dy mjete zjarrfikëse, 6 forca nga MZSH, 6 nga shërbimi pyjor, 5 nga njësia administrative dhe 2 forca vullnetare.
Qarku Dibër
Në malin e Allushit, pranë fshatit Plani Bardhë, bashkia Klos, zjarri po mbahet nën kontroll dhe monitorohet nga 6 forca të MZSH me 1 mjet, për të parandaluar përhapjen e mëtejshme, pasi brenda vatrës digjen ende trungje.
Qarku Berat
Në bashkinë Poliçan, jashtë territorit të Uzinës Mekanike, në një sipërfaqe me shkurre dhe ullishte, zjarri që prej mbrëmjes së kaluar është nën kontroll. Sot janë angazhuar 15 forca zjarrfikëse nga MZSH Poliçan.
Qarku Shkodër
Në fshatin Zagore, njësia administrative Shkrel, bashkia Malësi e Madhe, po punohet për shuarjen e zjarrit në një zonë të vështirë, me shkurre dhe barishte.
Në gjithë operacionet e shuarjes së zjarreve janë angazhuar 66 automjete zjarrfikëse dhe 760 forca operacionale. Forcat e Armatosura kanë kontribuar me 183 efektivë, 3 automjete zjarrfikëse dhe 3 helikopterë. Po ashtu, në ndihmë kanë ardhur edhe dy avionë Canadair nga Kroacia dhe Italia.
