Situata me zjarret në Greqi vazhdon të jetë problematike. Flakët kanë përpirë mijëra hektar pyje, tokë bujqësore dhe banesa. Fatmirësisht nuk është regjistruar asnjë viktimë nga zjarret, ndërsa disa persona kanë kërkuar kujdes mjekësor.
Njësia Komunale e Elymnia e Komunës Limni-Mantoudi-Agia Anna, në Evia, shpallet në gjendje të jashtëzakonshme nga Mbrojtja Civile, ku zjarret katastrofike vazhdojnë të shkaktojnë dëme të mëdha. Kjo deklaratë, e lëshuar me urdhër të Zëvendës Ministrit të Mbrojtjes Civile dhe Menaxhimit të Krizave, Nikos Hardalia, dhe një vendim të Sekretarit të Përgjithshëm të Mbrojtjes Civile, Vassilios Papageorgiou, do të jetë e vlefshme për gjashtë muaj, bën me dije CNN Grecce
Ndërsa në gjashtë rajone të vendit është aktivizuar alarmi i kuq i rrezikut. Nga ana tjetër kreu ekzekutiv u ka bërë thirrje për bashkëpunim dhe mirëkuptim në këto ditë problematike që po kalon Greqia.
“Ne po përballemi me një situatë jashtëzakonisht kritike në vendin tone, dhjetëra zjarre janë aktivë në të njëjtën kohë. Tre prej tyre, në Atikë, Evia dhe Ilia, me përmasa dhe intensitet të madh. Fatkeqësisht, vështirësitë janë ende para nesh pasi presim erëra të forta perëndimore në shumë zona të vendit tonë. Po flasim për kushte të pashembullta, pasi kanë paraprirë shumë ditë të nxehti intensiv, që e kanë kthyer të gjithë vendin në një fuçi pluhuri.”, ka thënë kryeministri i Greqisë, Ktyriakos Mitsotakis.
Në Athinën veriore gjatë natës pati shpërthime të disa vatrave të reja zjarri, e për pasoj mijëra njerëz u evakuuan. Ndërsa nga zjarret që përfshinë zonën gjatë natës u dogjën 5 mijë hektar pyje dhe u shkatërruan dhjetëra shtëpi.
Rumania dhe Zvicra i janë bashkuar Qipros, Francës dhe Suedisë duke ndihmuar me zjarrfikës, kamionë dhe helikopterë. Lufta me flakët vazhdon ende edhe në Spanjë, në brigjet jugore të Turqisë si dhe në jug të Italisë. Dëmet janë të pallogaritshme ndërsa erërat e forta dhe të nxehta që vijnë nga Afrika e Veriut, po e vështirësojnë edhe më shumë ndërhyrjen e grupeve operacionale.
