Një zjarr i fuqishëm ka dalë jashtë kontrollit në lindje të Kretës, Greqi, duke rrezikuar komunitete të tëra dhe zonat turistike.
Flakët shpërthyen të mërkurën pasdite në një terren të thyer pyjor pranë komunës së Ierapetrës dhe, të nxitura nga erëra të forta që arrijnë deri në tetë ballë të shkallës Beaufort, janë përhapur me shpejtësi drejt jugut.
Fronti i zjarrit, që tashmë shtrihet në të paktën 6 kilometra, po kërcënon shtëpi, struktura turistike dhe infrastrukturë kritike, përfshirë një stacion karburanti.
Shërbimet e emergjencës e kanë të vështirë të frenojnë përparimin e flakëve. Tymi ka mbuluar edhe zonat bregdetare, përfshirë plazhin Makry Gialos, rreth 10 kilometra nga Achlia, ku zjarrfikësit vijojnë luftën me zjarrin.
Në vendbanimin Agia Fotia, ku rruga kryesore është bllokuar nga policia, situata është përkeqësuar. Disa shtëpi dhe prona me qira janë shkatërruar, ndërkohë që banorët po përballen me ndërprerje të energjisë elektrike.
Autoritetet u kanë bërë thirrje banorëve dhe turistëve të shmangin çdo udhëtim jo të domosdoshëm për shkak të ajrit të ndotur, nxehtësisë ekstreme dhe reshjeve të hirit.
Të paktën katër persona të moshuar janë shtruar në spital me probleme në frymëmarrje si pasojë e thithjes së tymit.
Në të gjithë Kretën, spitalet janë vendosur në gjendje gatishmërie, ndërkohë që në komunën Ferma ka nisur evakuimi masiv i hoteleve, dhomave me qira dhe shtëpive, pasi zjarri po afrohet me shpejtësi. Në këtë operacion janë angazhuar zjarrfikës, forca policore dhe vullnetarë vendas.
Deri tani janë evakuuar rreth 1,500 persona nga zonat e prekura, të cilët janë zhvendosur në qytetin e Ierapetrës.
Rreth 200 prej tyre janë strehuar në arenën sportive të mbyllur të qytetit, ndërsa autoritetet po vazhdojnë operacionin e emergjencës për të shmangur një tragjedi më të madhe.
