Një ngjarje e rëndë ka ndodhur në Tetovë mbrëmjen e sotme, ku spitali Covid është përfshirë nga një zjarr i përmasave të mëdha. Mësohet se spitali është djegur plotësisht, ndërsa ndër të tjera bëhet me dije se tashmë flakët janë shuar.
Kryetarja e Komunës së Tetovës, Tetuta Arifi tha se rasti i zjarrit është raportuar te zjarrfikësit në orën 21:02. Fatkeqësisht si pasojë e flakëve ka pasur viktima, dhe deri tani akutoritetet kanë konfirmuar se të paktën një person ka humbur jetën.
Zv. komandanti i zjarrfikësve në Tetovë tha gjithashtu në një deklaratë për mediat se rasti te ata është paraqitur në orën 21:02, ndërsa është shuar i tëri në orën 21:45.
Më tej ai bëri me dije se ndërsa spitali po digjej, ka vazhduar nxjerrja e viktimave që ishin Brenda, ndërsa është konfirmuar një viktimë. Ndër të tjera, ai deklaroi se nuk dihet ende shkaku i zjarrit.
Ndërkohë, pritet që autoritetet të dalin në deklaratë për të informuar për bilancin e viktimave.
Kujtojmë se në Maqedoninë e Veriut nuk është aspak e mirë as situata nga pandemia e koronavirusit. Në 24 orët e fundit janë regjistruar 702 raste pozitive me Covid-19. Po ashtu në 24 orët e fundit janë regjistruar 24 viktima, ku 10 viktima janë shënuar vetëm në Shkup.
