Ish-anëtarja e Këshillit Kombëtar të PD-së, Edith Harxhi ka folur sërish në lidhje me ndarjen e PD-së në dy kampe. Harxhi e ftuar në Fax News ka paralajmëruar se kreu i PD-së, Lulzim Basha do të detyrohet të japin dorëheqjen brenda pak javësh.
Sipas Harxhit një udhëheqës që sipas saj nuk u bë kurrë lider nuk i reziston dot ortekut të krijuar nga ish-kryeministri Sali Berisha. Ajo thekson se baza e PD-së nuk është e çoroditur, por njerëzit sipas saj e dinë më mirë se çfarë duan në krye të PD-së dhe madje më mirë se drejtuesit politik.
“Basha do të jetë i detyruar të japë dorëheqjen shumë shpejt, për pak jave mendoj unë, pasi ky që po vjen është një ortek që bëhet sa vjen edhe më i madh dhe i pandalshëm. Një udhëheqës që nuk u bë kurë lider nuk i reziston këtij orteku. Ne jemi të shkëputur krejtësisht nga realiteti, vizitat e mia në degët e PD unë kam prekur realitetin shqiptar, i cili nuk njihet nga kafenetë e Tiranës as në udhëtimet turistike që bëjmë gjatë verës. Në PD gjen konservator të pastër, gjen folklor të bukur autentik, gjen filozofi popullore, gjen skamjen e vërtetë shqiptare. Baza nuk është e çoroditur fare, por njerëzit janë më mirë të orientuar politikisht sesa ata që janë në Tiranë madje edhe më shumë se drejtuesit politik”, shprehet , Edith Harxhi .
