Në projektin fillestar të Tunelit të Llogarasë, përveç ndërtimit të vetë tunelit prej 6 kilometrash, ishin parashikuar edhe dy ura në daljet e tij, të detajuara me kosto dhe specifikime teknike të plota. Njëra prej tyre, sipas projektit, do të ishte një urë e varur me një këmbë, me efekt panoramik në daljen e Palasës.
Megjithatë, kjo urë 110 metra e gjatë është zhdukur nga projekti përfundimtar dhe nuk është ndërtuar, ndonëse ishte ndër zërat më të kushtueshëm të planit fillestar. Kjo ngre pikëpyetje serioze mbi mënyrën se si janë menaxhuar fondet e këtij projekti gjigant, që ka kushtuar rreth 190 milionë euro.
Përveç kësaj, burime teknike tregojnë se punimet e Tunelit të Llogarasë nuk janë kolauduar, pasi mungon një kolaudator që të verifikojë cilësinë dhe sigurinë e ndërtimit. Në këto kushte, çdo drejtues që kalon në tunel, e bën këtë pa një garanci zyrtare për sigurinë e tij.
Në qendër të kësaj afere ndodhen tre emra kryesorë: kryeministri Edi Rama, zëvendëskryeministrja dhe ministrja e Infrastrukturës Belinda Balluku, si dhe ish-drejtori i Autoritetit Rrugor Shqiptar, Elvis Berberi. Këta të fundit u shfaqën publikisht në përurimin simbolik të tunelit, por projekti që ata promovuan duket se mbart shumë më tepër dritëhije sesa dritë në fundin e tij.
Tashmë mbetet për t’u parë nëse Prokuroria e Posaçme (SPAK) do të hetojë këtë aferë që përfshin zhdukjen e një elementi thelbësor të projektit dhe mungesën e kolaudimit, apo nëse edhe ky skandal do të mbetet në errësirën e Tunelit të Llogarasë.
