Anëtarja e Kryesisë së PD, Grida Duma, ka folur sërish për reformën zgjedhore.
Ajo deklaroi në rubrikën ‘Opinion’ në News24 se kjo reformë nuk mund të jetë thjesht riparim i kodit elektoral.
“Reforma nuk mund të jetë thjesht riparim i kodit elektoral. Propozimet për kodin zgjedhor janë të domosdoshme. Bërja me dije strukturave, apo qytetarëve, është një proces i domosdoshëm. Kam menduar dhe mendoj se reforma zgjedhore nuk mund të jetë riparim burokratik i kodit elektoral. Liria e votës së lirë nuk është vetëm potencë në letër. Unë vijoj të besoj se në politikën shqiptare duhet të rritet konkurrenca. Duhet t’i jepet mundësi sistemit të frymëzojë. Sado të diskutohet, një gjë është e sigurt se sot mungon; konkurrenca. A është e nevojshme të themi se çfarë ndodh brenda partive? Jo! E dinë të gjithë shqiptarët. Problemi në Shqipëri është se politika duket sikur punon për politikën, por ajo punon për ekonominë.”
Më tej, Duma theksoi se zhdukja e konkurrencës në politikë po e varfëron Shqipërinë.
Sipas saj, nëse sot do të mbaheshin zgjedhje të parakohshme në vend, padyshim që qytetarët do të votonin kundër qeverisë dhe kryeministrit Edi Rama.
“Nëse nuk e çojmë ujin tek konkurrenca, te përfshirja në politikë, kjo e bën shoqërinë që të motivohet dhe të prodhojë. Të prodhojnë në politikë dhe në ekonomi më pas. Zhdukja e konkurrencës në çdo qelizë, është duke varfëruar Shqipërinë. Njerëzit që do të votojnë padyshim që e rrëzojnë Edi Ramën. Sot politika është e mbyllur, këtu po bëhen interesa dhe afera të mbyllura. Ne themi PPP, por këto janë hajdutëri, janë tendera të negociuara. Ato janë vjedhje, s’kanë as emrin e vet. Nëse shqiptarët sot votojnë, do të votonin kundër kësaj qeveri. Ajo që i duhet politikës shqiptare është që njerëzit të vet prodhojnë. Reforma elektorale duhet të jetë frymëzuese. Ne duhet të hyjmë në këto zgjedhje për t’i fituar ato”, tha Duma.
Kujtojmë se Reforma Zgjedhore është një nga kërkesat kryesore të ndërkombëtarëve, e kërkuar me ngulm nga Bundestagu.
Integrimi i Shqipërisë në Bashkimin Europian do varet edhe nga realizimi i kësaj ‘detyre’ të caktuar nga të huajit.
