Është zgjedhur sot kryetari i ri i kuvendit të Kosovës, Glauk Konjufca. Me 69 vota pro, 33 kundër dhe asnjë abstenim, Konjufca nga LVV-ja ka marrë sot postin e ri në Kuvendin e Kosovës.
Një gjest patriotik u vu re teksa, një nga deputetët i vuri mbi tryezë një flamur të Shqipërisë.
Tashmë Kuvendi i Kosovës do të drejtohet nga Konjufca, teksa janë betuar edhe 114 deputetë, ndërkohë që 6 të tjerë mungojnë.
Po ashtu pritet që sot të votohet edhe qeveria “Kurti ll.” Sipas Kushtetutës së Kosovës në mungesë të një Presidenti, Konjufca do të zërë vendin e përkohshëm.
Vjosa Osmani ia dorëzoi detyrën Konjufcës ndërkohë që ky i fundit ia njohu meritat për kryerjen e detyrës me përgjegjësi të lartë.
Pjesë nga reagimi:
“E falenderoj zonjën Vjosa Osmani. E ka kryer me përgjegjësi të lartë detyrën e ushtrueses së detyrës së presidentes. Zonja Osmani keni dhënë shembull të shkëlqyeshëm në politikë. Mua më vjen mirë që pas zgjedhjes së kryeisë së Kuvendit është hapur rruga e zgjedhjes së institucioneve të reja, edhe me juve si presidente, ku ju uroj suksese.
Për mua nuk do të ketë deputetë të kësaj apo asaj partie. Për mua si kryetar i Kuvendit do të ketë deputetë të barabartë të popullit të Kosovës, sepse kështu jeni. Të gjithë së bashku dhe në emër tuajin, po i falënderojmë qytetarët e Republikës së Kosovës meqë pa votuar ata, ne nuk do mund të vinim këtu. Na priftë e mbarë dhe e shpall të mbyllur këtë seancë. Për seancën e zgjedhjes së qeverisë do t’iu lajmërojmë me kohë’’- tha Konjufca.
