Ditën e sotme, ambasadorët e SHBA, BE-së dhe Britanisë së Madhe kanë zhvilluar një takim me liderin e Partisë Demokratike, Lulzim Basha, në selinë blu, në fokus të të cili ka qenë realizimi i Reformës Zgjedhore.
Pas takimit anëtarët e Këshillit Politik të opozitës së Bashkuar, Oerd Bylykbashi dhe Petrit Vasili kërkojnë që të takohen nesër me Damian Gjiknurin dhe Rudina Hajdari.
Bylykbashi dhe Vasili kërkojnë që nesër në orën 17:00 të kenë një takim të radhës për të gjetur gjuhën e përbashkët.
Kërkesa e përfaqësuesve të opozitës për mbledhjen nesër në 17.00
PërshëndetjeNë vijim të diskutimeve të deritanishme dhe faktit që mbledhja e datës 31 maj 2020 nuk u zhvillua, me synim gjetjen e konsensusit për çështjet e përcaktuara në axhendën e Këshillit Politik, propozojmë mbledhjen e Këshillit nesër, datë 2 qershor 2020, në orën 17.00.
Përfaqesuesit e Opozitës së Bashkuar
Oerd Bylykbashi
Petrit Vasili
Kërkesa vjen një ditë pasi dështoi konsensusi për Reformën Zgjedhore, ndërkohë tensionet janë në kulm mes palëve.
Ambasadorja amerikane, Yuri Kim, dhe ambasadori i Bashkimit Europian, Luigi Soreca, kërkojnë që të arrihet sa më parë në ujdi, si një mbajtje premtimi, por edhe plotësimi i një kushti kyç për integrimin e vendit.
