Ish-kryetari i Partisë Demokratike, Sali Berisha, ka paralajmëruar një 20 shkurt të dytë, pas atij të vitit 1991 ku u rrëzua busti i diktatorit Enver Hoxha.
Berisha gjatë një emisioni televiziv, tha ndër të tjera se është përgatitur për zgjedhje të qeta në 25 prill, por nëse qytetarëve u cënohet vota, opozita do të përmbysë kultin e më të ligut që ka patur Shqipëria pas Enver Hoxhës.
“Opozita duhet të përgatitet për ditën më paqësore me votën e saj më 25 prill, por njëkohësisht duhet të jetë gati për një 20 shkurt të dytë.
Në 20 shkurt shqiptarët përmbysën në pamje të parë një bronz, por në të vërtetë një kult, më të keqin që kishin patur në histori.
Nëse iu dhunohet vota, opozita do të përmbysë më 25 prill kultin e më të ligut që kanë pasur pas Enver Hoxhës, që grabit zgjedhësit, për një kryebandit që nuk njeh normë, nuk njeh ligje, moral dhe nuk respekton asgjë”, ka thënë ish-kryeministri Berisha.
Po ashtu ish-kryeministri Berisha bëri edhe një “mea culpa” në lidhje me çështjen e ndjeshme të Gërdecit.
Ai deklaroi se Gërdeci ishte një aksident teknologjik, por kishte edhe përfshirje shtetërore, ndërsa shtoi se për sa kohë ishte në pushtet, ka bërë gjithçka që ajo zonë të rindërtohej.
“Kam kërkuar në parlament që tragjedia e Gërdecit të shpallej vrasje shtetërore pa dashje. E kam kërkuar pasi ishte aksident teknologjik, por kishte edhe përfshirje shtetërore.
Atëherë meqë kishte ndërmarrje shtetërore për sigurinë, padyshim kishte një përgjegjësi shtetërore.
Unë bëra gjithçka dhe u rindërtua ajo zonë me miliona euro. Unë kërkova që të shpalleshin vrasje shtetërore pa dashje. Këta që përdorën Gërdecin vazhduan që ta përdorin këtë term në gjykatë”, ka deklaruar Berisha./Gazetareforma.com/
