Ambasada e Shteteve të Bashkuara në Tiranë ka publikuar një mesazh të qartë dhe të fortë në prag të zgjedhjeve të 11 majit, duke theksuar se vota është zëri i çdo qytetari dhe nuk duhet të ketë asnjëherë çmim.
Në mesazhin e shpërndarë, Ambasada nënvizon se përmes votës qytetarët përcaktojnë të ardhmen e tyre dhe të vendit, duke theksuar fuqinë që ka secili për të zgjedhur qeverinë që do t’i përfaqësojë.
Ky apel vjen vetëm dy ditë para zgjedhjeve, në një klimë të tensionuar ku partitë politike kanë denoncuar raste të blerjes së votës dhe presioneve ndaj qytetarëve gjatë fushatës.
Ambasada amerikanë thekson se zgjedhja duhet të bëhet lirshëm, me ndërgjegje dhe pa u shitur, duke e cilësuar votën si një e drejtë themelore dhe një mjet vendimtar në demokraci.
“Vota jote është zëri yt. Vota jote është e ardhmja jote. Vota jote nuk ka çmim,” shkruhet në postim.
