Zgjedhjet e jashtëzakonshme në katër komunat e banuara me shumicë serbe në veri të Kosovës do të mbahen më 19 maj, ka theksuar Presidenti i Kosovës, Hashim Thaçi.
Duhet theksuar se më 27 nëntor të vitit 2018 katër kryetarët e këtyre komunave , kanë dhënë dorëheqje, duke kundërshtuar vendimin e Qeverisë së Kosovës për vendosjen e taksës 100% ndaj prodhimeve të importuara nga Serbia.
Në deklaratën e përbashkët, ish-kryetari i Zubin Potokut, Stevan Vuloviq, i Zveçanit, Vuçina Jankoviç, i Leposaviçit, Zoran Todiç, dhe i Mitrovicës Veriore, Goran Rakiç, kanë thënë se me këtë taksë, “serbëve të Kosovës u është kërcënuar e drejta për jetesë, shërim dhe mbijetesë.”
Ndërkohë dhe Kryeministri i Kosovës Ramush Haradinaj përmes një statusi në profilin e tij në “Facebook” ka shprehur qëndrimin e tij pas shpalljes të zgjedhjeve të jashtëzakonshme në veri të vendit.
Haradinaj tha se partitë politikë në veri duhet të hyjnë në zgjedhje, ndërsa shtoi se qytetarët duhet të dalin masivisht në zgjedhje.
Qeveria e Kosovës, pavarësisht thirrjeve të komunitetit ndërkombëtar për heqjen e taksës, ka thënë se ajo do të mbetet në fuqi deri kur Serbia të njohë pavarësinë e Kosovës.
