Pas shkarkimit nga detyra të Gledis Nanos, sot zyrtarisht emërohet në vend të tij Muhamet Rrumbullaku si drejtor i Përgjithshëm i Policisë së Shtetit.
Këshilli i Ministrave emëroi sot drejtorin e Përgjithshëm të polciisë së Shtetit, Muhamet Rrumbullakun. Ndërkohë lajmin e bëri me dije ministri i Brendshëm Bledi Çuçi.
“Zoti Rrumbullaku është oficer karriere i lartë në policinë e Shtetit që ka mbajtur e kryer shumë detyra në gjithë piramidën e Policisë së Shtetit. I vlerësuar në cdo pozicion që ka qenë dhe i vlerësuar gjithashtu dhe së fundmi në pozicionin që ka mbajtur deri javen e kaluar të drejtorit të Agjencisë së Mbikëqyrjes Policore. Është drejtori që reformoi agjencinë që është kthyer në agjenci civile dhe rezultatet e reformës kanë filluar të ndihen ndërkohë.
Zoti Rrumbullaku mban gradën e ‘Drejtuesit të Parë’ në piramidën e Policisë së Shtetit dhe plotëson të gjitha kushtet për të qenë drejtori i Përgjithshëm i Policisë së Shtetit. Në orën 16:00 do bëjmë një prezantim të gjerë të Zotit Rrumbullaku dhe dy drejtorëve të tjerë të agjencive të Ministrisë së Brendshme, drejtoreshës së re të IKMT dhe drejtorit të ri të Agjencisë së Mbikëqyrjes policore”, deklaroi ministri Çuçi.
Është paradoksale fakti që teksa hiqet një drejtor i përgjithshëm policie me argumentin që ka treguar mangësi në përmbushjen e objektivave, vendoset një tjetër me figurë aspak të pastër. Muhamet Rrumbullaku, oficeri i policisë që drejtonte dikur SHÇBA ka dalë përpara komisionit të verifikimit të figurës dhe një ndër çështjet kryesore për të cilën u pyet ka qenë fotografia e tij me Arben Frrokun, i akuzuar dhe dënuar për vrasjen e komisar Dritan Lamajt në vitin 2014.
Ndërkohë që në foto Rrumbullaku shihet duke drekuar dhe duke festuar me çifteli krah Arben Frrokut.
Edhe pse pas verifikimit të komisionit, ajo foto ka qenë një rastësi, dhe nuk është bashkëpunim, shfaqja e tij me një vrasës, nuk duket aspak normale për një oficer policie dhe pretedent kryesor për të marrë drejtimin e Policisë së Shtetit në shkallë kombëtare.
Po ashtu një rast tjetër ku tregohet se Rrumbullaku nuk është treguar korrekt në zbatimin e detyrës së tij lidhet me çështjen e Klodian Rashës.
Shërbimi për Çështjet e Brendshme dhe Ankesat me në krye Muhamet Rrumbullaku, Policia e Tiranës me në krye Dhimitraq Ziun dhe Drejtoria e Përgjithshme e Policisë së Shtetit me në krye Ardi Veliun, kanë paraqitur një version tjetër për vrasjen, duke lehtësuar pozitat e policit vrasës dhe duke rënduar viktimën, duke e paraqitur si kriminel. Në njoftimet publike të SHÇBA dhe policisë flitet për vrasje në ndjekje e sipër, sikur Klodiani kishte një armë në dorë që ia kishte drejtuar policit, për një pistoletë afër vendit të ngjarjes etj.
Nga ana tjetër ironik është fakti që Partia Socialiste në kohën që ishte në opozitë e ka sulmuar Muhamet Rrumbullakun për shoqërinë e tij me autorin e vrasjes së Dritan Lamaj, Arben Frrokun.
