Presidenti i Ukrainës, Volodymyr Zelensky, e cilësoi si një takim me potencial historik bisedën që zhvilloi me presidentin amerikan Donald Trump në Vatikan, duke shpresuar që ajo të çojë në përfundimin e luftës.
“Takim i mirë. Diskutuam shumë çështje ballë për ballë. Shpresojmë për një rezultat konkret,” shkroi Zelensky në një postim, ku theksoi se bisedimet përfshinë çështje si “mbrojtja e jetës së qytetarëve tanë, një armëpushim të plotë dhe të pakushtëzuar, si dhe një paqe të qëndrueshme që do të parandalojë përsëritjen e konfliktit”.
“Ky ishte një takim shumë simbolik që mund të kthehet në historik nëse arrijmë rezultate të përbashkëta. Faleminderit, President Donald Trump!”, shtoi ai.
Takimi mes Trump dhe Zelensky-t zgjati rreth 15 minuta dhe u zhvillua në Bazilikën e Shën Pjetrit.
Fotografitë e shpërndara nga presidenca ukrainase tregojnë të dy liderët të ulur përballë njëri-tjetrit në një sallë të madhe mermeri. Një zëdhënës i Shtëpisë së Bardhë e cilësoi bisedën si “produktive”.
Në një tjetër fotografi, Trump dhe Zelensky shfaqen së bashku me kryeministrin britanik Keir Starmer dhe presidentin francez Emmanuel Macron.
Pas ceremonisë së lamtumirës për Papa Françeskun dhe takimit me liderët, Trump u largua nga Roma për t’u kthyer në SHBA.
Presidenca franceze deklaroi se takimi mes Trump, Zelensky, Starmer dhe Macron u zhvillua në një atmosferë “pozitive”.
