Është bërë me dije shkaku i aksidentit tragjik që ndodhi javën e kaluar në Qafë-Muzinë, ku pesë persona humbën jetën. Përplasja e dy mjeteve ka ndodhur në mënyrë tangente dhe këtë e ka përcaktuar pozicioni i “Land Rover-it” të drejtuar nga 22-vjeçarja Rexhina Celhaka. Gjurmët e frenimit në vendngjarje mungojnë, që do të thotë se drejtuesja e mjetit nuk ka frenuar fare. Nëse do të kishte, aty do të bazohej edhe sa shpejt “Land Rover-i” kishte qenë.
Ekspertët kanë konfirmuar se nëse do të kishte përplasje frontale, energjia e çliruar nga të dy mjetet do të varej nga pesha e secilit mjet dhe në këtë rast do të kishte vetëm lëndime. Në raport thuhet se në rastin në fjalë një pjesë e energjisë u përthith nga goditja në, ndërsa pjesën tjetër e ruan lëvizja. Gjithashtu ka dyshime për respektimin e shpejtësisë 30 km në orë nga të dy mjetet.
Ndërkohë, Celhaka ka qenë duke udhëtuar me një automjet që i përkiste djalit të xhaxhait të saj nga Tirana në drejtim të Sarandës e prej aty drejt destinacioneve që nuk i njihte. Ajo ishte nën shoqërinë e mikeve të saj dhe rrugën e kishte përshkuar me ndihmën e GPS-it dhe të celularit. Në momentin e aksidentit ka pasur edhe reshje të lehta shiu, që kanë favorizuar ngjarjen e ndodhur.
Rexhina Celhaka ndodhet në spitalin e burgut të grave në Tiranë dhe mësohet se është në gjendje të rëndë psikologjike. Asaj iu komunikua masa e arrestit teksa ishte e shtruar në spital dhe ajo vetëm ka qarë dhe është përpjekur të shfajsohet, duke thënë se nuk ka qenë me shpejtësi, po ishte furgoni i drejtuar nga Bardhi Proda (i cili humbi jetën ën aksident) që ishte me shpejtësi të madhe.
