SPAK ka arrestuar 10 persona, përfshirë pronarin e banesës ku ishte ngritur laboratori, Endi Sejdini, një 25-vjeçar pa precedentë penalë.
Laboratori ndodhej në Qerekë të Fushë-Krujës, në një ndërtesë që Sejdini përdorte edhe për mobileri.
Spak bën me dije se laboratori ishte ngritur prej disa muajsh në një zonë pranë aeroportit dhe portit të Durrësit, duke lehtësuar transportin dhe shmangur monitorimin me dron për shkak të fluturimeve të shumta.
Ngarkesa e parë me lëkurë bagëtish, brenda të cilave ishte tretur kokaina, mbërriti në shtator, ndërsa ngarkesa e dytë arriti në nëntor. Hetuesit ndërhynë pasi ekspertë nga Venezuela dhe Kolumbia filluan përpunimin në laborator.
Gjatë aksionit u arrestuan 10 persona, 7 shqiptarë dhe 3 të huaj. Arrestimet u kryen në lokalitete të ndryshme, përfshirë një lokal në Vishnje dhe një vilë luksoze në zonën e Kodrës së Diellit.
