Është zbuluar edhe vendi “misterioz” ku Shqipëria i mori gati 1 mijë doza të vaksinës Pfizer/BioNtech.
Bëhet me dije se Gjermania është vendi nga ku i erdhën Shqipërisë 975 dozat e para të vaksinës së Pfizerit.
Kanali i famshëm bilateral për të cilin foli dje kryeministri Edi Rama është Gjermania, si vend eksporti dhe origjine i vaksinës që ka mbërritur në Shqipëri.
Ndërkohë është bërë publik edhe dokumentacioni i ardhjes së 975 dozave të Pfizer/BioNtech.
Në faturën e zhdoganimit të vaksinës në Rinas, shihet se vaksina ka si vend origjine dhe eksporti Gjermaninë, ndërsa dërguesi është kompania Pfizer/BioNtech.
Dozat e vaksinave mësohet se kanë mbërritur në Shqipëri në orën 13:45, dhe janë zhdoganuar në orën 14:42, vetëm 18 minuta para se në stadiumin “Air Albania” të niste vaksinimi.
Sakaq pas ardhjes së vaksinave, pritësi i tyre ka qenë agjensia doganore ‘Ben Impex&Co”, ndërsa bie në sy fakti se kutia me vaksina ka mbërritur “dorazi”.
Në faturën e zhdoganimit shihet edhe se vaksina është transportuar dorazi me kuti, dhe më pas është tërhequr nga punonjësi i agjencisë doganore për të kaluar tek Instituti i Shëndetit Publik, institucion që e ka kaluar me urgjencë vaksinën tek stadiumi “Air Albania”.
Ndryshe nga sa u përfol dje nëpër media nga kryeministri Edi Rama se vaksina ka qëndruar vetëm tri ditë në doganë dhe deklaratës së mjekut Pëllumb Pipero ku tregoi se vaksina ishte në ambientet e Institutit të Shëndetit Publik në mëngjes, vihet re se vaksina ka qëndruar vetëm 1 orë në Rinas, ku ka mbërritur në orën 13:45 dhe ka dalë nga aty më 14:42./Gazetareforma.com/
