Mësohen detaje të reja mbi të plagosurin e ngjarjes që tronditi Brukselin ditën e djeshme. Erion Hasanbelliu, i cili u qëllua me 6 plumba pas shpine nga një person ende i pa identifikuar, është një emër i njohur për drejtësinë shqiptare, pasi bashkë me të vëllanë akuzohen se, në vitin 2002, kanë vrarë në Belgjikë, Julian Çelën dhe kanë plagosur rëndë, Kasandër Nogan. Vëllai i tij Geron Hasanbelli është vënë në pranga 14 qershor 2013, në rrugën e Barrikadave në Tiranë.
Arrestimi dhe ekstradimi i tij në vitin 2013-të, është bërë pasi Gjykata e Fierit, me vendimin e datës 7 shtator 2009, e ka dënuar me 25 vjet heqje lirie për kryerjen e veprës penale të “vrasje me paramendim për gjakmarrje e kryer në bashkëpunim”, “vrasje me paramendim për gjakmarrje“ e kryer në bashkëpunim mbetur në tentativë, “mbajtje pa leje të armëve të zjarrit”.
Erion Hasanbelliu gjithashtu dyshohet të jetë i përfshirë në disa ngjarje të tjera kriminale. Ai ka qenë bashkëpunëtor në rolin e shoferit në vitin 2005, në atentatin ndaj biznesmenit Sokol Çapja në Elbasan.
Ndërkohë dyshohet se Hasanbelliu ka qenë i përfshirë edhe në atentatin ndaj Bledar Muçës, i cili humbi jetën në Anversë të Belgjikës pak muaj më parë.
Në vitin 2000 i vritet babai Erion Hasanbelliut pas një konflikti.
