Të reja të tjera kanë dalë lidhur me ekzekutimin e biznesmenit Ferdinad Polia pasditen e së martës në Grudë të Shkodrës.
Ferdinandi me një të shkuar problematike, ishte kthyer prej disa vitesh në vendlindje për t’ju përkushtuar turizmit malor, aty ku kishte edhe një bujtinë.
Ai është arrestuar në vitin 2010-të në kuadër të operacionit “Treviso cleaning” si pjesë e një grupi shpërndarësish kokaine në lokalet e Trevisos por edhe Venecias. Një vit më vonë në 2011 Polia 24 vjeçar u dënua me 4 vite burg.
Mediat italiane raportojnë se në atë kohë, banda pjesë e së cilës ishte kishte arritur të fitonte nga shitja e kokainës deri në 800 mijë euro. Në rastet kur klientet femra nuk kishin para, në këmbim pranohej dhe kryerja e marrëdhënies seksuale.
Madje në një rast grupi kishte arritur të fuste në kurth një vajzë 17 vjeçe në Trevizo, dhe i kishin kërkuar asaj që t’u prezantonte shoqe të virgjëra. Në total, si pjesë e grupit u arrestuan 12 persona, ku gjysma e tyre ishin shqiptarë.
Polia përveç trafikut të drogës, kryente edhe vjedhje sipas policisë.
Në vitin 2015 ai u kthye në Theth, dhe u bë një nga njerëzit më të dashur për zonën, madje u bë edhe pjesë e administratës shtetërore, duke u emëruar administrator i Zonave të Mbrojtura në Parkun Kombëtar të Thethit.
Në vitin 2017-të rezulton të jetë proceduar penalisht në gjendje të lirë bashkë me kryeplakun e Thethit, për shkak se polica konstatoi një parcelë me kanabis në këtë zonë. Megjithatë reputacioni që kishte në zonë, si një njeri që punonte për të mirën e komunitetit vijon të jetë i fortë edhe sot.
Policia e Shkodrës po heton për të kaluarën e tij si një nga pistat për vrasjen, por nuk përjashtohen as konflikte të reja ku biznesmeni 35-vjeçar mund të jetë përfshirë. Kujtojmë që ditën kur u ekzekutua ai sapo kishte dalë nga një servis në zonën e Grudës, aty ku kishte çuar Fuoristradën e tij për tu lyer. Autori që i kishte zënë pritë pasi e qëlloi për vdekje dogji motorçikletën pak metra larg vendit të ngjarjes dhe u zhduk.
Burimi: Balkanweb
