Një vatër e re e murtajës së ruminantëve të vegjël është konfirmuar në fshatin Sukth Vendas, në njësinë administrative Thumanë të Fushë-Krujës.
Rasti u sinjalizua nga vetë pronari i tufës, i cili dyshoi se delet e tij mund të ishin prekur nga kjo sëmundje infektive. Pas analizave laboratorike, u konstatua se rreth 100 krerë janë të infektuar me murtajë.
Për të frenuar përhapjen e sëmundjes, autoritetet do të ndërmarrin asgjësimin e tufës, proces që do të kryhet në Lezhë nga një firmë e specializuar në eliminimin e kafshëve të sëmura.
Paralele me këtë masë, specialistët u bëjnë thirrje të gjithë fermerëve të zbatojnë rreptësisht masat e biosigurisë, duke shmangur kontaktin e deleve dhe dhive me tufa të tjera dhe duke kufizuar lëvizjet nëpër ferma.
Murtaja e ruminantëve të vegjël është një sëmundje infektive që zakonisht shfaqet në vendet e Afrikës.
Në Shqipëri, ajo cilësohet si një sëmundje që kërkon çrrënjosje të plotë, ndaj autoritetet përqendrojnë ndërhyrjet në izolimin e vatrave, dezinfektimin dhe eliminimin e kafshëve të prekura.
Situata epidemiologjike ka njohur përkeqësim në ditët e fundit. Përveç Sukthit, një tjetër vatër është konfirmuar edhe në Zallbastar të Tiranës, duke e çuar në pesë numrin e zonave aktive. Sipas të dhënave zyrtare nga Agjencia Kombëtare e Veterinarisë dhe Mbrojtjes së Bimëve, deri tani janë konfirmuar shtatë ferma pozitive në të gjithë vendin, me një total prej 882 krerësh të prekur.
Më herët, një tjetër vatër u konstatua në fshatin Shuec të bashkisë Devoll, ku delet dhe dhitë kishin shfaqur simptoma të qarta klinike. Përveç kësaj, rastet janë shënuar edhe në Shkodër, Dibër, Bulqizë dhe Skrapar.
Sëmundja nuk përbën rrezik për shëndetin e njeriut, por për kafshët përfaqëson një rrezik të madh për shkak të vdekshmërisë së lartë dhe humbjeve ekonomike që sjell për blegtorët.
Për të frenuar përhapjen, që nga 9 qershori është në fuqi ndalimi i lëvizjes së dhenve dhe dhive midis fermave, përveç rasteve kur ato transportohen drejt thertoreve me dokumentacion veterinar të plotë.
Gjithashtu, ndalohet çdo formë tregtimi kafshësh të gjalla, panaire apo grumbullime publike që përfshijnë kafshë.
Ministria e Bujqësisë ka angazhuar 39 ekipe kontrolli, të cilat kanë inspektuar deri më tani 983 ferma, duke mbuluar mbi 164 mijë krerë dhen dhe dhi në gjithë territorin.
Situata është raportuar edhe në Sistemin e Njoftimit të Menjëhershëm të BE-së për sëmundjet e kafshëve, ndërsa janë kërkuar mbështetje dhe udhëzime nga Komisioni Evropian.
Autoritetet u bëjnë thirrje të gjithë fermerëve dhe blegtorëve të tregojnë kujdes maksimal, të raportojnë çdo dyshim në numrin falas 0800 3366 dhe të respektojnë me përpikëri masat parandaluese për të frenuar përhapjen e mëtejshme të kësaj sëmundjeje shkatërruese për blegtorinë.
